Trauer um Karl-Heinz Groth
(Thema des Tages vom 23.04.2025)
Bereits am 11. April 2025 verstarb der niederdeutsche Autor, Pädagoge und Kulturförderer Karl-Heinz Groth aus Goosefeld bei Eckernförde. Ein Nachruf von Christoph Ahlers (NDR):
„De sik in de verleden Johrteihnten för Plattdüütsch interesseert hett, de keem an Karl-Heinz Groth nich vörbi. He weer vele Johren Vörsitter vun de Plattdüütsch Gill in Eckernför un Lidmaat in verscheden Plattdüütsch-Gremien. He hett sik in den Sleswig-Holsteenschen Heimatbund engageert un an den ersten Nedderdüütsch-Erlass för de Scholen mitarbeidt.
Karl-Heinz Groth weer en Dithmarscher Jung. An’n 4. Januar 1940 is he in Lunden to Welt kamen. Sien Öllern weern Buurn un harrn en Kohlenhannel. In Heid hett Karl-Heinz Groth sien Abitur maakt un denn in Hamborg un Flensborg op Schoolmester studeert. 1963 kreeg he sien erste Steed - op Helgoland, wo he ok dat Leid vun de Volkshochschool övernahmen harr. Achteran weer he Schoolmester in Heid, Büsum un Wyk op Föhr, ehr he denn vun 1982 bet 2003 de Baas vun de Gorch-Fock-School in Eckernför weer.
He hett de plattdüütschen Weken in Eckernför un Heid organiseert un de positive Resonanz hett em Knööv geven för all sienen Insatz:
2004 hett he den Klaus-Groth-Pries för Lyrik vun de Stadt Heid initiieert. Karl-Heinz Groth hett sik ok as nedderdüütschen Autor un Översetter en Namen maakt. Meist 30 Böker hett he över de Johren rutbröcht – mit egen Vertellen un mit Översetten so as „Wenn de Haifisch Minschen weern“ - Bert Brecht siene Geschichten vun den Herrn Keuner, oder de Lütthasenschool, de Wiehnachtgoos Auguste oder ok „Lüttenwiehnachten“ vun Hans Fallada.
Karl-Heinz Groth is för sien Engagement sünnerlich för Plattdüütsch mit de Sleswig-Holsteen-Medaille uttekent worrn, mit de Lornsenkeed vun‘n Sleswig-Holsteenschen Heimatbund un mit dat Bunnsverdeenstkrüz. He is 85 Johr olt worrn.“