Schreibung:
Erstdruck (1859) 〉〉 Erstruck mit Übersetzung 〉〉 Orthographie Herrmann-Winter
John Brinckman
Kamråd kumm!
mit Såbel un Muskeet,
denn helpt dat nich! Hul nich so lut
un heff di nich so Greet!
De Trummel schleit nu trumtritrum!
Kamråd kumm! Kamråd kumm!
Rechten, linken! Speck un Schinken!
Gråd de Been un stief de Nack -
Kamråd kumm mit Sack un Pack!
Un wenn een möt, denn möt he wull,
un got is, wenn he kann
un nich gliek hett de Büxen vull
un höllt sik as ’n Mann.
Kommissbrot hen! Kommissbrot her!
Is Helm dat, is dat Hot –
heff dor ik, heff ik hier dat schwer,
süh, Diern, dat is gliek got!
Ik wull, hier stünn man sonn Franzos,
sonn Klås von Hannemann –
fuurts mit de Plemp fohrt ’k up se los
un haut se in de Pann.
Ik weet, du büst un bliffst mi tru;
na lach eens, Diern! Wat weenst?
Keen anner ward mien Fru as du –
un nu adschüss noch eens!
De Trummel schleit nu trumtritrum!
Kamråd kumm! Kamråd kumm!
Rechten, linken! Speck un Schinken!
Gråd de Been un stief de Nack -
Kamråd kumm mit Sack un Pack!