De Vare was Schepe, knütt Strümp ut de Wull
Un hungeharkt s’ nasten vun Drüttels sick vull;
Irst knütt he un knütt un de Schap hörr he blot,
Man nasten doa hörr he den Junke vun ’t Got.

De Oll de was Schepe; den Schepe sin Saen
De mett nu na Lasten sin Kurn uppen Baen;
De hett nu dat Got un harr frigt ’ne rik Brut, –
Wu bölken de Drüttels to Hals em nu rut!

De Oll de was Schepe un drünk man ’n Sluck, –
De Saen de makt nu mit Schampanje kluck kluck!
Un Jochen, de Ritknecht, de moet nu so don,
As wir sin Herr Junke un würr ball Baron.

Nu hetzt he tohopen doa mit de Nobleß
Parforßen mit Hunn un Piküres de Vöß,
Un Nachts denn so hetzt he doa mit se in ’t Spill
Sin Vare sin Vöß mit Spadill un Manill.