„Plattdeutsche Klassiker lesen!“

John Brinckman: Vagel Grip


Inhaltsverzeichnis

Erstdruck (1859) 〉〉 | Erstdruck mit Übersetzung 〉〉 | Orthographie Herrmann-Winter

-       188       -






He stürf


Nu, Meister, schruf He to dat Sark!
Nu, Moder, Moder, måk di stark
un drööch di af dien Trån!
De Wåch, de führ nu vör, Jehann,
un Schritt för Schritt lettst du dien Spann
hen nå den Kirchhoff gåhn.

Wi, Kinner, wi gåhn mit to Fot;
de Wech to Gott is ümmer got,
un is ’t sonn schworen Gang,
so schwor as ik em gåhn nu möt,
mi drägen doch sacht hen mien Föt,
wier he noch eens so lang.

Wat freut ik mi, as Gott em geef –
sonn eenzig Kind hett een so leef,
wat helpt dat alltosåm’!
He stürf; ik bring em nå sien Graff,
Gott’s Husdör is dat, dor sett ’k em af. –
Führ to in Jesu Nåm’! -