Dor in de Döns wat ’s dat för ’n Larm
in dat oll Jägerhus?
De grot Stuf is hell, blank un warm,
de Holtwohrer hett sien Fru in ’n Arm,
un gråd as sonn wild Immenschwarm
tooft dor dat Görengrus.

Ruhklås hett klingt! Ruhklås hett klingt!
hurra! As Küselwind,
wenn dat wädert, rönnt, hüppt, danzt un springt,
hallot, juucht, kriescht dat, lacht un singt,
wat mi he|bröcht, wat di he bringt...
wo selig is sonn Kind!

Dor stünn vull Ståt Dannbömeken,
as drööch dat sien Hochtietstüüch,
blank in sien Kron ’ne güllen Fåhn,
mit sieden Bänner angedån,
un rot un gäl Wassstapel ståhn
em hell up jede Twiech.

Wat drächst för schnåksches Åft, lütt Bom!
Von Appel, Backbeer, Plumm,
von Honnigkoken, grot un lütt,
von Päpernœt, von brun un witt,
un Safranpöppings vull he sitt,
un weck sünd scheef un krumm.